Na Mwandishi Wetu

Benki ya Biashara ya DCB leo imezindua muonekano wake mpya , ambao  unaenda sambamba na mikakati ya benki hiyo  ya kuboresha huduma zake na kukidhi malengo na maono iliyojiwekea mara baada ya kupewa leseni ya kujiendesha kama benki kamili ya biashara.

" Muonekano huu mpya unawiana na mabadiliko na mafanikio yatokeayo kwenye benki hii yanayolenga kuisimika DCB kwenye  njia ya ukuwaji na utowaji wa huduma bora zinazorandana na mabadiliko ya soko la kibenki,'  alisema Mkurugenzi Mtendaji wa DCB, Godfrey Ndalahwa, kwenye uzinduzi leo jijini Dar es Salaam.

Akizungumza katika uzinduzi huo uliofanyika pamoja na Mkutano Mkuu wa 19 wa Mwaka wa Wanahisa wa benki hiyo Ndalahwa alisema, muonekano huo mpya ni sehemu ya utekelezaji wa mpango kazi wa DCB wa miaka mitano 2018-2022, unaolenga kuikuza na kuibadilisha benki  ili kwenda sawia na hali ya soko.

Akifafanua, Ndalahwa alisema muonekano huo mpya utalenga kuwezesha benki hiyo kuwafikia Watanzania wengi zaidi nchi nzima, kutoa huduma bora zaidi za kiubunifu  na zenye gharama nafuu katika mrengo wa kidigitali, kuendelea kuongeza thamani ya uwekezaji ili kukuza mapato ya wanahisa, kuimarisha benki, na kuhakikisha fedha za wateja zipo salama.

Mkurugenzi huyo alieleza kuwa nembo mpya ya DCB ina mistari sambamba miwili inayoakisi dhana ya kuwa DCB ni benki ya biashara inayoongozwa kwa misingi imara na uzoefu na uthibitisho wa mafanikio makubwa toka kuanzishwa kwake, na ina doti jekundu kuashiria safari ya benki hiyo katika kuwa mstari wa mbele kutoa huduma za kidigitali na kuwafikia wateja wengi zaidi.

" Vilevile, benki pia imebadili rangi kwenda nyekundu na bluu ikiwakilisha uwezo na nguvu ya kutoa huduma, uzoefu katika soko, utulivu tunapohudumia wateja wetu, uimara wa misingi tuliojiwekea, uaminifu kwa wateja wetu na shauku ya kutoa huduma bora kwa wateja wetu,' alisema Ndalahwa.

" Muonekano huo mpya wa DCB utaonekana  kwenye vituo vyetu vyote vya kutolea huduma, matawi, ATM, mawakala, huduma za mtandao wa simu (DCB Digital), mitandao ya kijamii, tovuti na sehemu nyingine zote."

Benki ya Biashara ya DCB ilianzishwa mwaka 2002 kuitikia kilio cha wakazi wengi wa Jiji la Dar es Salaam cha kukosa chanzo cha mitaji midogo ya biashara, hali  iliyokuwa changamoto kubwa kwa wajasiriamali wadogo katika jitihada za kuboresha maisha yao, hasa kwa kuzingatia masharti magumu ambayo  yalikuwa yanawekwa na benki nyingi za kibiashara.

 " Kwa kipindi chote cha miaka 19 ya uendeshaji, jukumu mama la benki hii limeendelea kuwa ni kutoa huduma bora za kifedha huku ikijikita zaidi katika kutengeneza miradi endelevu ya kupunguza umaskini na kuendeleza jamii.Benki imeendelea kushindana kwenye soko kwa kuhakikisha inatoa huduma bora na bidhaa zenye ubunifu kwa wateja wake," a lisema Ndalahwa.  

Alitaja mafanikio makubwa kuwa ni, kuboresha leseni  na kupanda hadhi kutoka benki ya mkoa hadi kuwa benki kamili ya biashara, kuwa  benki ya kwanza kujiunga na Soko la Hisa la Dar es salaam, kulipa gawio mfululizo  tangia kuanzishwa kwake, kutoa huduma na bidhaa zinazokidhi viwango vya ushindani, na kufungua matawi 8 na vituo vya kutolea huduma 12

Pamoja na hayo, alisema DCB imekuwa ikitoa huduma bora kwa wateja mbalimbali wadogo, wa kati na wakubwa, ambao hadi sasa benki ina wateja zaidi ya 200,000; imeweza kufikia mizania inayokaribia billioni 200; ina huduma za simu ya mkononi (DCB DIGITAL); ina huduma za internet banking na Visa, na ATM  zinazounganishwa  kwenye huduma za Umoja Switch zinazopatikana kwenye ATM 300 nchi nzima.

Ndalahwa alibainisha azma ya dhati ya Benki ya Biashara ya DCB ya kuendelea kubuni huduma bora kwa lengo la kupanua wigo wa  upatikanaji wa huduma za benki hiyo nchini kote.

" Tumeimarisha huduma zetu, na sasa mteja anaweza kupata huduma za kibenki popote alipo kupitia DCB Digital, huduma za kibenki kwa njia ya intaneti na simu za mkononi, mawakala nchi nzima na matawi yetu ili kuondoa usumbufu  wa wateja wetu kuja matawini. Tunawaahidi kuendelea kuwa wabunifu na kuendelea kukidhi mahitaji ya wateja wetu kulingana na matakwa na matarajio yao," alisema."

Baadhi ya wakurugenzi wa DCB pamoja na waalikwa wengine wakisikiliza hotuba ya Mkurugenzi Mtandaji wa benki hiyo, Godfrey Ndalahwa wakati wa uzinduzi rasmi  wa muonekano mpya wa benki hiyo uliofanyika pamoja na Mkutano Mkuu wa 19 wa Wanahisa wa DCB jijini Dar es Salaam leo.

Kaimu Sheikh wa Mkoa wa Singida Issa Nassoro,akizungumza na Waislamu  katika dua ya arobaini ya Sheikh Mohamed Makula iliyofanyika Iguguno wilayani Mkalama mwishoni mwa wiki. 

Sheikh wa Wilaya ya Singida Issa  Simba,akizungumza kwenye dua hiyo.

 Wakina Mama wakiwa katika Arobaini ya Marehemu Mohamed Makula.

Dufu likipigwa  katika mkutano huo.

Kaimu Sheikh wa Mkoa wa Singida Issa Nassoro, akiongoza kuomba dua kwenye arobaini hiyo.

Dua katika arobaini ya Marehemu Mohamed Makula, ikiendelea.

 Na Dotto Mwaibale, Singida

KAIMU Sheikh wa Mkoa wa Singida, Issa Nassoro amemtangaza Sheikh Shabani Mkanga kuwa Kadhi wa mkoa huo kuanzia sasa.

Sheikh Nassoro alitoa tangazo hilo katika dua ya arobaini ya Sheikh Mohamed Makula iliyofanyika Iguguno wilayani Mkalama mwishoni mwa wiki.

" Muda mchache tangu tuanze dua hii ya Mzee wetu Makula Katibu wa Baraza Kuu la Waislamu Tanzania  (BAKWATA) Mkoa wa Singida Sheikh Burhan Mlau amenipa nakala ya uteuzi wa Sheikh Shabani Mkanga kuwa umekamilika sasa ndio Kadhi nikiwa kama Kaimu Sheikh wa mkoa nimeipokea hiyo nakala na mbele ya shughuli hii namtangaza rasmi kuwa Kadhi wa Mkoa wa Singida na ninakuagiza Katibu wangu  Sheikh Mlau kuanzia sasa ufanye kazi na kadhi huyo mteule," alisema Nassoro.

Alisema kesi zote zilizokwishafunguliwa sasa zielekezwe kwa Sheikh Shabani Mkanga na si vinginevyo na aliyekuwepo kwenye nafasi hiyo sasa ataitwa kadhi mstaafu na hana mamlaka ya kufanya kazi hiyo tena.

Alisema mambo hayo ndio yanayotakiwa kufuatwa na Waislamu kwani mamlaka za juu zimemteua na wao wajibu wao ni kumsikiliza na ku mfuata.

Sheikh Nassoro alitumia nafasi hiyo kuwaomba waislamu wafike mahala waseme migogoro sasa basi kwani wana migogoro mingi ambayo haina tija na kuwa haiwafai.

"Tuna fursa nyingi tunaziacha ambazo wajibu wetu kuzitumia lakini hatuzitumii, wasio na migogoro wanazitumia fursa hizi moja ya fursa ambayo nataka Waislamu wa Mkalama waitumie ni eneo la uwanja lililotangazwa wakati wa mazishi ya Sheikh Makula kuwa ufanyiwe kazi na kwa kuwa viongozi wote mpo hapa natoa agizo kuwa uwanja huo ujengwe chuo au Shule ya Awali, Msingi na Sekondari ikiwa namna ya kumuenzi marehemu na ipewe jina lake," alisema Nassoro.

Alisema wamuenzi mzee huyo kwa kuweka alama na watu waanze ujenzi kwa kutumia fursa ya ujenzi huo kama wanavyotumia wenzao wa kristo misamaha ya kodi ya ununuzi wa vifaa vya ujenzi ambayo waislamu hawaitumii hasa wanapo jenga misikiti na madrasa zao wampelekee Katibu wa Bakwata barua za maombi hayo badala ya kumpelekea barua za majungu na vitina ambazo zimejaa ofisini kwa katibu huyo.

Aidha Sheikh Nassoro aliwataka waislamu wa Msikiti wa Mariam Iguguno aliokuwa akiongoza Sheikh Mohamed Makula kuwa watulivu katika kipindi hiki kigumu cha msiba na mchakato wa kumpata Sheikh mwingine na pindi atakapopatika atakaye teuliwa na mamlaka husika wampe ushirikiano.

 Na Mwandishi Wetu,Michuzi TV

KIWANDA cha Magari cha GFA kilichopo Kibaha mkoani Pwani kimepata ugeni mkubwa baada ya kutembelewa na wanachama wa Umoja wa Watengenezaji Magari Duniani(AAAM).

Wakiwa kwenye kiwanda hicho wanachama wa umoja huo wamepata fursa ya kuzungunza na kubadilishana mawazo na viongozi wa kiwanda cha GFA ambapo pamoja na mambo mengine wamezungumzia pia kuimarisha uhusiano.

Taarifa iliyotolewa kwa vyombo vya habari imesema kwamba Kiongozi wa Msafara wa AAAM ambaye pia ni Mkurugenzi wa Kampuni ya Nissan ukanda wa Afrika Mike Whitfield  amesema watashirikiana na kiwanda hicho cha GFA katika nyanga mbali mbali na kuweza kujitegemea na suala la uunganishwaji wa magari na Tanzania inakuwa  kama nchi zingine zinazotengeneza magari kama ilivyokuwa nchi ya Afrika Kusini.

Kwa upande wake Mwenyekiti wa Bodi ya Wakurugenzi wa  wa kampuni ya GFA Assemblers ,Mehbooub Karmali ameushukuru ujio huo wa msafara wa viongozi hao na kusisitiza ujio wao ni neema kwao na mambo yakienda  vizuri basi Serikali itakuwa inapata fedha za kigeni kutokana na magari kutengenezwa nchini hali itakayoongeza soko la ajira kwa vijana wengi wanao hitimu katika vyuo vyetu.

Wakati huo huo wanachama hao wakiwa nchini Tanzania wamekutana  na viongozi wa Serikali na kuzungumza mambo kadha katika kuhakikisha lengo la Tanzania ya Viwanda linatimia kwa vitendo

Miongoni mwa wanachama wa umoja huo ambao wametembelea kiwanda hicho na kufanya mazungumzo na Serikali wanatoka katika kampuni za Nisani,Ford, BMW, Isusu, Toyota na Volkswagen.

Na Godwin Myovela, Singida

WAZIRI Mkuu Kassim Majaliwa ameagiza sehemu zote zinazolima zao la alizeti ikiwemo mikoa ya Singida, Dodoma na Simiyu kutumia asilimia 10 ya mikopo inayotengwa kwa makundi ya vijana, wanawake na wenye ulemavu kwa kuwapatia mitaji ya mbegu za zao hilo badala ya fedha ili kupanua wigo wa uzalishaji wake, sanjari na kukuza uchumi wa mtu mmoja mmoja kupitia kilimo.

Waziri Mkuu aliyasema hayo juzi mkoani hapa wakati akizindua kampeni ya kitaifa ya kuhamasisha kilimo cha alizeti alipokutana na wadau mbalimbali wa mnyororo wa thamani ya zao hilo kutoka mikoa ya Singida, Dodoma na Simiyu.  

"Toeni mitaji ya mbegu kwa makundi haya badala ya fedha. Mana hata wengine mnaowapatia mikopo ya fedha hizo hawarudishi, wapeni mbegu na wasimamieni hii italeta tija kubwa," alisema.

Waziri Mkuu aliweka bayana faida kubwa ambayo mkulima atanufaika nayo endapo atajikita kwenye kilimo cha alizeti, kuwa pamoja na mambo mengine, mkulima atakayelima ekari moja atatumia wastani wa shilingi 250,000 lakini atakwenda kupata takribani shilingi 1,350,000.

"Mathalani ukilima zao hili Kwa ekari moja utatumia mbegu kilo 2 kwa gharama ya elfu 70, utavuna magunia 15 ya takribani kilo 65 na kwa kila gunia utapata lita 18 za mafuta, na kila Lita Kwa bei ya soko ni shilingi 5000...kwaiyo unakuta unakwenda kupata takribani 1,350,000 ukitoa 250,000 za maandalizi ya shamba hadi kuvuna unajikuta na faida kubwa," Alisema Waziri Mkuu.

Alihamasisha wakulima kuchangamkia fursa hiyo ili kuinua hali ya vipato vyao lakini pia kutumia zao kama suluhisho la kukabiliana na uhaba wa mafuta ya kula nchini ambapo takribani tani 400,000 hulazimika kuagizwa nje ya nchi ili kutosheleza mahitaji.

Alisema uwezo wa nchi kwa sasa ni kuzalisha tani 290,000 pekee huku akisisitiza kiasi hicho ni sawa na asilimia 45 ya jumla ya tani zipatazo 650,000 zinazohitajika nchini.

"Nchi huagiza tani zipatazo 400,000 kufidia upungufu wa mafuta ya kula kwa gharama ya shilingi bilioni 474 kila mwaka kwa takwimu za sasa," Alisema Waziri Mkuu.

Alisema mkakati wa Serikali uliopo ni kuongeza uzalishaji wa mazao ya mafuta yakiwemo alizeti, chikichi, pamba, karanga na ufuta ili kujitosheleza na kuondokana ya adha ya uagizaji wa mafuta ya kula kutoka nje.

Kuhusu mkakati uliopo wa kuinua tija ya kilimo cha alizeti, pamoja na mambo mengine, Waziri Mkuu amewataka Wakuu wa Mikoa kuandaa mpango mkakati ikiwemo kutenga maeneo mahususi kwa ajili ya kilimo cha zao hilo.

Aidha, aliwaagiza wakuu hao wa Mikoa kuhakikisha kila Taasisi na mashule wanaweka mara moja utaratibu wa  kuanza kuzalisha alizeti, jambo ambalo anaamini litasaidia hata kuwajenga kiujuzi wanafunzi kuweza kutumia mafunzo hayo ili kujitegemea hapo baadaye.

Alisema mkulima, mwekezaji au yeyote kwenye mnyororo wa kilimo hicho anayehitaji kuwekeza kwenye alizeti serikali itamlinda na kumhakikishia kila aina ya ushirikiano.

Hata hivyo, aliwakumbusha Wizara ya Kilimo kuandaa kalenda ya kilimo cha zao hilo na kuisambaza kwa wakulima kabla ya msimu mwingine kuanza sambamba na kuongeza idadi ya maafisa ugani kwenye Vijiji na Kata ili kuongeza tija.

Waziri Mkuu pia aliwaagiza Wakuu wa Wilaya ambazo alizeti inalimwa kuandaa vitalu vya mashamba darasa ya mbegu bora kama mwendelezo wa uzalishaji wake baada ya Utafiti, ili kurahisisha upatikanaji wake.

Suala la mkoa husika kuwa na kanzi data (database) ya wakulima na hali halisi ya kilimo hicho ni miongoni mwa maagizo yaliyopewa mkazo lengo ni kufanya kilimo cha alizeti kuwa tegemeo, na hatimaye kuweza kusambaza uchumi wa mtu mmoja mmoja.

Agizo lingine ni kuanza kuunda vikundi vya ushirika ili kurahisisha usambazaji elimu ya mbinu bora za kilimo, lakini zaidi kupeleka huduma za kiugani kwa mkulima kwa wakati.

Pia aliwataka Wakuu wa Wilaya kuhakikisha kila Afisa Ugani anapimwa Kwa matokeo Kwa kupewa eneo na kulima yeye mwenyewe shamba lake la mfano kulingana na zao la mahali husika, ili wakulima wanaomzunguka waende kujifunza kwake, na endapo shamba hilo litashindwa kutoa matokeo mazuri basi aondolewe kwenye halmashauri husika.

Hata hivyo, Waziri Mkuu alizitaka Taasisi mbalimbali za Fedha, ikiwemo Benki ya Kilimo kujitambulisha kwa wakulima na kusambaza elimu ya namna ya kunufaika na mikopo ya kilimo suala ambalo wengi hawalifahamu.

Pia aliagiza Wizara ya Kilimo kuanza mkakati wa ujenzi wa maghala ya kuhifadhia alizeti sambamba na Wizara ya Viwanda kwenda mara moja kusikiliza kero mbalimbali zinazowakabili wenye viwanda vya ukamuaji mafuta ya zao hilo.

"Tutahakikisha mtandao wote wa wanaojihusisha na kilimo cha alizeti tunausimamia ipasavyo. Na naagiza kila kiongozi au taasisi itakayofanya mkutano wowote kwenye mikoa inayolima zao hili kuwe na ajenda ya kuhamasisha alizeti," alisema Waziri Mkuu na akaongeza;

"Kikao hiki sio mwisho nitarudi tena Kwa tathmini kabla ya msimu kuanza ili kuangalia je tulijipanga kwenye kuhamasisha?, pembejeo zimefika kwa wakati? je tuko tayari kulima?, tumeandaa ekari ngapi kwa kilimo hiki? ili tuone kama tutafikia shabaha yetu," alisema kupitia kampeni hiyo ya Twende Tukalime Alizeti ina Faida.

 Mkuu wa Mkoa wa Pwani Abubakar Kunenge amezindua awamu ya  pili ya utengenezaji wa magari aina ya HONG YANG katika kiwanda cha GF Assemblers Kibaha mkoni Pwani

Akizungumza baada ya uzinduzi wa magari hayo, Kunenge alikemea baadhi ya tabia za watendaji wa serikali za kupishana katika ofisi za wawekezaji kwa visingizio mbali mbali mbali

 Ikiwamo kulazimisha kuonana na wamiliki ama kwa visingizio vya kutaka kufanya ukaguzi  hali inayowafanya wawekezaji kuwa na hofu na kujikuta wanashindwa kutimiza majukumu yao

Kunenge alisema Serikali ya mkoa wa Pwani inahakikisha inapata maendeleo kwa kuongeza fursa ya biashara na uwekezaji wenye mazingira rafiki na utawala bora kwa hiyo hataki kusikia ama kuona watendaji wanakua kikwazo katika kufanikisha mpango huo na kwamba hatawavumilia.

" wakati Serikali ikijenga mazingira rafiki na wawekezaji sisi wenyewe mafisa wa Serikali tumekuwa kikwazo ,   Nae Meneja wa kampuni  GF Vehcle Assemblers , Ezra Mereng alisema lengo  lao ni kuunda kila aina ya chapa (brand ) ya magari kwa kuwa teknolojia na mitambo waliyonayo inauwezo wa kuunganisha magari aina zote zenye viwango na vigezo vya kitaifa na kimataifa.

 Mereng alisema kiwanda hicho kilianza kwa kuunda magari chapa aina ya FAW na sasa  wamezindua  chapa ingine  ya Hongyan  na kuwataka wadau na makampuni mengine  ya magari kuacha kuagiza badala yake walete GFA kuundiwa (Assembling) kwa zingatia vigezo vyoote vya kimataifa.

Na Mwandishi Wetu, Michuzi TV

TAASISI ya Wajibu imesema kwamba imepitia na kuchambua Bajeti ya Serikali ya mwaka 2021/2022 ambapo kwa sehemu kubwa wameipongeza kwa kuja na vyanzo vipya vya ukusanyaji mapato ikilinganishwa na bajeti za miaka iliyopita.

Akizungumza leo Juni 16,2021, kuhusu uchambuzi wa bajeti ya Serikali, Mkurugenzi Mtendaji wa Wajibu Ludovick Utouh amesema taasisi hiyo aliianzisha mwaka 2015 ikiwa na malengo ya kujenga uwezo wa wananchi kufahamu mambo yanayowahusu uwajibikaji wa rasilimali za Taifa. 

"Sisi wajibu tunajikita zaidi kwenye uwajibikaji kwenye rasilimali za taifa,niseme ni mara ya kwanza leo WAJIBU imeingia kwenye kuchambua bajeti ya Taifa kwa jicho la uwajibikaji.Tunafahamu Juni 10 mwaka huu Waziri wa Fedha na Mipango Dk.Mwigulu Nchemba aliwasilisha bajeti ya Serikali bungeni.

"Ni bajeti ya mwaka 2021/2022 ni bajeti ya kwanza chini ya mpango wa tatu wa maendeleo ya taifa wa miaka mitano na ni bajeti ya kwanza pia kwa awamu ya sita ya Rais Samia Suluhu Hassan na bajeti hii na mpango huu inachukua dhima inayosema kujenga uchumi shindani na viwanda kwa maendeleo ya watu,"amesema Utouh.

Amefafanua taasisi ya Wajibu imefanya uchambuzi wa bajeti pendekezwa kwa kuzingatia uwazi, uwajibikaji na utawala bora, hivyo imekuja na maoni, changamoto na mapendekezo yanayolenga kuboresha ukamilishaji wa bajeti ya taifa ya mwaka 2021/2022.

"Kama  tulivyoona na tulivyosoma , makadirio ya bajeti ya Serikali ya mapato na matumizi yameweka malengo ya jumla kwa kuanza na lengo la kwanza la kuendelea kuboresha mazingira ya uwekezaji na ufanyaji biashara kwa kuweka mazingira rafiki kwa mlipa kodi.

"Kwa lengo la kuvutia uwekezaji, ukuaji wa biashara ndogondogo na zakati  ili kapunia wigo wa kodi.Pili kuboresha mifumo ya usimamizi na ukusanyaji wa kodi ili kupanua wigo wa kodi.Kwa kweli bajeti hii imekuja na vyanzo vipya vya mapato ya Serikali ambavyo huko nyuma havijakuwepo.

"Zamani mabajeti mengi ya Serikali yakuliwa ni marudio ya yaliyofanyika huko nyuma, lakini safari hii tunaona Serikali imekuja na taratibu za kukusanya mapato kwa kutumia ufumo wa ununuzi wa umeme LUKU, mfumo ambao hakuwepo nyuma.

"Wamekuja kwenye kodi ya laini za simu ambayo ni kitu kipya na vile vile Waziri ametuambia Serikali inaingia kwenye hati fungani za manispaa kama njia ya mapato ya Serikali, tunapaswa kuipongeza Serikali kwa ubunifu huo,"amesema.

Ameongeza pia bajeti inalenga kuimarisha uendeshaji wa mashirika ya umma ili kuendelea kufanya kazi kibiashara, kuongeza uzalishaji wa mazao yatokanayo na sekta ya kilimo, mifugo na uvuvi.Pia kuboresha kilimo cha umwagiliaji, kuogeza mnyororo wa thamani na masoko ya mazao ya kilimo, kuchochea uvumbuzi na uhuhishaji wa teknolojia kutoka nje.

"Kuchochea uwekezaji kwenye viwanda hasa zinazotumia malighafi zinazotoka hapa nchini, kudhibiti utoroshaji madini na kujenga mitambo ya uchenjuaji madini nchini pamoja na viwanda vya kuongeza thamani kwenye madini yanayozalishwa nchini.

"Ikiwemo jitihada za maksudi za kuwajengea uwezo zaidi wachimbaji wadogo katika ushiriki wao sekta hii, uboreshaji wa miundombinu ya sekta ya usafirishaji wa nishati , kuboresha utoaji huduma za kijamii hasa katika sekta ya afya,elimu na maji.

"Na kuimarisha ushirikiano wa nchi yetu na nchi jirani,kanda na kimataifa. Haya ndio malengo makuu ya bajeti inayozungumziwa sasa hivi bungeni.Hivyo uchambuzi wa bajeti hii tuliofanya tumeona kuna masuala matano ambayo bajeti imeyataja, ukweli ukienda kwenye ripoti za CAG za miaka ya nyuma zilikuwa ni mapendekezo.

"Kwa ajili ya utekelezaji wa Serikali, nitaeleza mabadiliko ya sheria ya ukaguzi wa umma sura ya 418, kama mtakumbuka mwaka 2013 Serikali ilileta mabadiliko ya sheria ya ukaguzi ya mwaka 2008 ambapo sheria ilitaka CAG anawapasilisha ripoti zake bungeni kama alivyowasilisha Aprili mwaka huu, serikali nayo inatakiwa kwenda sambamba siku hiyo hiyo iwasilishe  majibu,"amesema.

Ameongeza hiyo kitu ilipingwa sana lakini ilipita, hivyo kwa wao watalaamu wa ukaguzi walijua haitekelezeki.Bahati nzuri Serikali imetambua hilo na imekuja na mapendekezo ya kubadilisha yale marekebisho yaliyofanyika mwaka 2013 .

"Pili kuna mabadiliko ya sheria ya mikopo , dhamana na misaada sura ya 134, nayo hii mabadiliko haya yatairusu Serikali kuidhamini kampuni au taasisi yoyote ya umma kukopa kiasi kisichozidi hisa za serikali au taasis husika.

"Ambapo hii inaenda kujibu pendekezo la CAG ambapo amekuwa anahoji mara nyingi kuhusu upungufu wa mitaji kwa mashirika yanayosimamiwa na Serikali .Tatu kuna kumekuwa na kelele kuhusu mikopo ya Serikali kwenye mifuko ya hifadhi ya jamii.

"Ukweli Serikali inakopa hailipi na wakati mwingine hailipi riba , kwa hiyo mara nyingi inapochukua miaka mingi kwa kulipa madeni yale inaathiri utendaji kazi wa mifuko hiyo.Kwa hiyo bajeti hii inatuambia Serikali italipa madeni inayodaiwa na mifuko ya hifadhi ya jamii kwa kutenga fedha kwenye bajeti na kutumia hatifungani zitakazoiva kwa nyakati tofauti kuanzia miaka miwili hadi miaka 25.

"Hii itasaidia kuyajumuisha madeni ya mifuko ya hifadhi ya jamii kwenye deni la taifa, mara nyingi madeni hayo yalikuwa hayaingizwi kwenye deni la taita.Utaratibu huo sasa madeni hayo yatakuwa yanaingizwa kwenye deni la taifa, itasaidia mifuko hii kuwa na fedha za kuwekeza na kujiendesha kwa ufanisi zaidi,"amesema.

Aidha amesema jambo la nne katika baheri hiyo ni Serikali kuongeza mapambano zaidi dhidi ya rushwa, udanganyifu na ubadhirifu wa mali za umma."Kama mnavyojua ile lugha ya ufisadi huko nyuma , pesa kupigwa huko na huko kitu ambacho CAG amekuwa akikizungumza kila wakati.

"Serikali kusema kweli imedhamiria kukaza uzi , na kuweka mazingira magumu zaidi ya upotevu au matumizi mabaya ya fedha na serikali za taifa. Kuna mfano wa mwenendo wa fedha na makusanyo ya serikali yenye viashiria vya rushwa kwa miaka mitatu iliyopita.

"Na tano ni mapato ya Mamlaka ya Bandari Tanzania (TPA) Mamlaka ya Mawasiliano Tanzania(TCRA) na Wakala wa Meli Tanzania(TASAC) kuanzia mwaka 2021/2022 yatakusanywa na mfumo huo kupitia GPE na kuingizwa kwenye akaunti ya makusanyo zilizopo Benki Kuu.

"Nafikiri hizi zimetokana na maoni ya CAG kwenye ripoti yake ya mwaka 2019 ambapo kuliokana kuna upotevu Sh.bilioni 3.9 kutokana na udanganyifu katika Bandari ya Kigoma na Mwanza ambao ulitokana na udhaifu wa mifumo ya ndani katika usimamizi wa malipo, hivi kwa upande wa CAG ni furaha, tunaona utekelezaji wa mapendekezo yake.

Kwa upande wake Mkuu wa Chuo Kikuu Mzumbe tawi la Dar es Salaam Profesa Honest Ngowi amesema bajeti ya mwaka huu kuna aina mpya za ukusanyaji kodi ambazo zinaweza kuwa na mjadala kwa mfano kutoza kupitia umeme ina mjadala wake lakini ni aina tofauti ya kutoza hiyo kodi ukilinganisha na ilivyozoeleka.

"Njia ya kwanza ni kuboresha mazingira ya uwekezaji na biashara , hapo ndipo tunapozungumzia wigo wa kupanua kodi, na hii muhimu kwasababu kodi zote hizi zinatokana na uzalishaji wa bidhaa na huduma usipopanua wigo na uwekezaji zaidi utazikosa.

"Lakini kuboresha mazingira yatakayochochea ulipaji kodi wa hiyari, hiyo muhimu sana.Ulipaji kodi wa kushurutishana ni gharama sana na unaweza kuangukia fedha nyingi kupotea lakini utumiaji wa TEHAMA unarahisisha ukusanyaji wa kodi.

"Siku hizi kuna mfumo wa kulipia kodi zako kiganjani, msingi wake kuna watu wanataka kulipa kodi lakini kwenda kupanga foleni kwenye mabenki inapoteza muda lakini kufanya kiganjani ndio kinazungumziwa hapa,"amesema Prof.Ngowi.

 Mkurugenzi Mtendaji wa Taasisi ya WAJIBU , Ludovick Utouh akizungumza mbele ya Waandishi wa Habari leo mkoani Dar es Salaam kuhusu uchambuzi wa bajeti ya Serikali,ambapo Taasisi ya WAJIBU imesema kuwa imepitia na kuchambua Bajeti ya Serikali ya mwaka 2021/2022 na kwamba sehemu kubwa wameipongeza kwa kuja na vyanzo vipya vya ukusanyaji mapato ikilinganishwa na bajeti za miaka iliyopita,Pichani kulia ni Mkuu wa Chuo Kikuu Mzumbe tawi la Dar es Salaam Profesa Honest Ngowi .

Mkuu wa Chuo Kikuu Mzumbe tawi la Dar es Salaam Profesa Honest Ngowi akifafanua jambo mbele ya Waandishi wa Habari (hawapo pichani) leo mkoani Dar es Salaam,wakati akifafanua kuhusu Bajeti ya Mwaka huu na uwepo wa aina mpya za ukusanyaji kodi tofauti  na ilivyozoeleka hapo awali

Na. Farida Ramadhani na Peter Haule, WFM, Dodoma

Waziri wa Fedha na Mipango, Mhe. Dkt. Mwigulu Lameck Nchemba, ametoa ufafanuzi wa baadhi ya tozo alizowasilisha bungeni wakati wa Mapendekezo ya Bajeti Kuu ya Serikali kwa mwaka wa fedha 2021/22 na kuleta mkanganyiko kwa wananchi ikiwemo makato ya miamala ya simu, kodi ya majengo kwa njia ya Luku na Makato yanayopendekezwa ya mafuta kwa ajili ya ujenzi wa barabara.

Dkt. Nchemba ametoa kauli hiyo Jijini Dodoma alipokutana na kuzungumza na Wahariri wa vyombo vya habari nchini kupitia Jukwaa la Wahariri (TEF), katika kikao kilichoandaliwa na Wizara ya Mawasiliano na Teknolojia ya Habari.

Dkt. Nchemba alisema kuwa kodi hizo zimetafsiriwa kinyume na lengo la Serikali, ambapo kwenye kodi ya kuongeza salio mtu akiweka kuanzia Sh. 1000 hadi Sh. 2500, atatozwa shilingi 10, shilingi 2500 hadi 5000 atatozwa Sh. 21, shilingi 50,000 hadi 100,000 atatozwa shilingi 186 na shilingi 100,000 kwenda juu anatozwa shilingi 200 na sio kila siku ni pale anapoweka mud awa maongezi.

“Hatujaweka kodi kwenye laini za simu kama ambavyo baadhi ya wananchi wamekuwa wakichanganya, hata kule Bungeni wanachanganya wanasema sasa kila siku itakuwa inakatwa shilingi 10 mpaka 200 kwa hiyo kama ni 200 kwa siku 30 ni shilingi 6000, halafu hata kama hukuweka fedha, siku ukiweka inakatwa kama nipige tafu, hatukuweka hivyo”, alieleza Dkt. Nchemba.

Alibainisha kuwa haimaanishi kwamba shilingi 10 sio mzigo lakini Serikali iliangalia matatizo yaliyopo na kugundua kuwa yanagharimu zaidi, kuliko thamani ya shilingi 10 itakayotozwa kama kodi.

Alifafanua kuwa miradi mikubwa inayotekelezwa nchi ukiwemo wa mradi wa Bwawa la umeme la Mwalimu Nyerere ambao unahitaji zaidi ya shilingi trililioni nne na ujenzi wa Reli ya Kisasa unaohitaji zaidi ya shilingi trilioni 20 ili kukamilika, iwapo fedha zote zitategemea mikopo nchi itapitiliza uwezo wa kukopa na kutokukopesheka hivyo ushiriki wa wananchi ni muhimu.

Akielezea kuhusu kodi ya miamala ya simu Dkt. Nchemba alisema kuwa kila mwananchi atakaopofanya miamala kwenye simu chini ya shilingi 1000 kodi hiyo haiwahusu, kuanzia shilingi 1000 hadi 2000 atatozwa shilingi 10, shilingi 10,000 hadi 15, 000 atatozwa shilingi 300, shilingi 30,000 na kuendelea atatozwa shilingi 1000 na shilingi milioni tatu na kuendelea watatozwa shilingi 10,000.

Kuhusu Kodi ya Majengo kwa kutumia LUKU alisema kuwa mfumo huo mpya unatumika katika nchi nyingi Duniani na unarahisisha ukusanyaji wa mapato kuliko mfumo ulikuwepo ambao unawafanya watu kutumia muda mwingi kwenye foleni.

Kwa upande wa kodi katika mafuta, alisema ongezeko la kodi hiyo itasaidia kukarabati, kujenga na kufufua barabara ambazo ni muhimu katika usafiri na usafirishaji.

Alisema kutumia barabara mbovu ni gharama kubwa kuliko ongezeko la kodi hiyo kwenye mafuta, akitolea mfano wa vifo vya wakinamama wajawazito wanopokwenda kujifungua kutokana na ubovu wa barabara hizo.

Kwa kuwafuata walipa kodi kwa njia ya kawaida hatuzidi watu laki mbili, kwa kutumia Mita za umeme watu wamezidi milioni tatu kwa hiyo tukaona kwa nini tusitumie utaratibu huu wa digitali ili kuwaondolea watu usumbufu.

Waziri Dkt. Nchemba alisema kuwa fedha zitakazopatikana katika kodi hizo zitawekwa moja kwa moja kwenye mifuko husika kama mfuko wa Barabara na elimu hivyo kutumika kwa kusudi lililowekwa.

Kwa upande wao wahariri walioshiriki semina hiyo wamempongeza Waziri Dkt. Nchemba pamoja na uongozi wa Wizara kwa kutoa ufafanuzi huo na kuomba kuendelea na utaratibu huo ili kuondoa mikanganyiko kwa wananchi. 

Waziri wa Fedha na Mipango, Mhe. Dkt. Mwigulu Lameck Nchemba (Mb) akizungumza katika semina ya Jukwaa la Wahariri wa vyombo vya habari nchini (TEF) iliyoandaliwa na Wizara ya Mawasiliano na Teknolojia ya Habari, jijini Dodoma.

Waziri wa Mawasiliano na Teknolojia ya Habari Mhe. Dkt. Faustine Ndugulile (Mb), akizungumza wakati akimkaribisha Waziri wa Fedha na Mipango Mhe. Dkt. Mwigulu Lameck Nchemba (Mb) (hayumo pichani), kuzungumza na wahariri wa vyombo vya habari nchini, jijini Dodoma.

Waziri wa Mawasiliano na Teknolojia ya Habari Mhe. Dkt. Faustine Ndugulile (Mb), na Katibu Mkuu wa wizara hiyo Dkt. Zainab Chaula, wakimsikiliza Waziri wa Fedha na Mipango Mhe. Dkt. Mwigulu Lameck Nchemba (Mb) (hayupo pichani) wakati akizungumza na wahariri wa vyombo vya habari nchini, jijini Dodoma.

Waziri wa Fedha na Mipango, Mhe. Dkt. Mwigulu Lameck Nchemba (Mb), na Mwenyekiti wa Jukwaa la wahariri Deodatus Balile, wakimsikiliza Waziri wa Mawasiliano na Teknolojia ya Habari Mhe. Dkt. Faustine Ndugulile (Mb) akizungumza katika semina ya wahariri wa vyombo vya habari nchini iliyoandaliwa na Wizara hiyo jijini Dodoma.

Baadhi ya washiriki wa semina ya wahariri wa vyombo vya habari nchini wakimsikiliza Waziri wa Fedha na Mipango, Mhe. Dkt. Mwigulu Lameck Nchemba (Mb), alipokuwa akitoa ufafanuzi kuhusu baadhi ya tozo alizowasilisha bungeni ambazo zimeleta mkanganyiko kwa wananchi ikiwemo kodi za miamala ya simu na kodi ya majengo, jijini Dodoma.

Mwenyekiti wa Jukwaa la Wahariri Tanzania (TEF) Bw. Deodatus Balile, akitoa neno la shukrani baada ya Waziri wa Fedha na Mipango, Mhe. Dkt. Mwigulu Lameck Nchemba (Mb), kuzungumza na washiriki wa semina ya wahariri wa vyombo vya habari nchini, jijini Dodoma.

Mmoja wa washiriki wa semina ya wahariri wa vyombo vya habari nchini iliyoandaliwa na Wizara ya Mawasiliano na Teknolojia ya Habari Bw. Allen Lawa, akiuliza swali baada ya Waziri wa Fedha na Mipango, Mhe. Dkt. Mwigulu Lameck Nchemba (Mb), kutoa ufafanuzi wa tozo zilizoibua mkanganyiko katika hotuba aliyoiwasilisha bungeni, jijini Dodoma.

Waziri wa Fedha na Mipango, Mhe. Dkt. Mwigulu Lameck Nchemba (Mb), akiagana na baadhi ya washiriki wa semina ya wahariri wa vyombo vya habari nchini iliyoandaliwa na Wizara ya Mawasiliano na Teknolojia ya Habari , jijini Dodoma

(Picha na Kitengo cha Mawasiliano Serikalini, WFM, Dodoma)

KATIKA kuadhimisha Siku ya Mtoto wa Afrika, taasisi isiyo ya kiserikali ya Nipe Fagio imesisitiza kuwa ni muhimu serikali, taasisi, makampuni yanayozalisha taka na jamii kwa ujumla kuongeza jitihada katika utunzaji wa mazingira ili kuwalinda watoto dhidi ya magonjwa yatokanayo na uchafuzi wa mazingira.

Hayo yamezungumzwa na Mratibu Sera wa taasisi ya Nipe Fagio, Bi Veronica Hollela wakati wa tukio maalum lililofanyika katika Shule ya Msingi Bonyokwa la kuadhimisha Siku ya Mtoto wa Afrika, inayoadhimishwa kila ifikapo tarehe 16 mwezi Juni kila mwaka.

Bi Veronica amesema kuwa katika kuhakikisha kuwa mtoto anaishi na anasema katika mazingira Safi na Salama ni lazima jamii, serikali na wadau mbali mbali waupokee mfumo wa Taka Sifuri ambao ni mfumo endelevu na jumuishi wa usimamizi na udhibiti wa Taka ngumu kuanzia kwenye uzalishaji uhifadhi, usafirishaji na utumiaji wa bidhaa.

"Ni muhimu jamii ijifunze kutenganisha taka kwa ajili ya kurahisisha uhifadhi na utumiaji wa taka kama rasilimali ikiwemo utengenezaji wa mbolea ya mboji itokanayo na taka ozo na urejelezaji wa taka," alisema Bi. Veronica.

Aliongeza kuwa mfumo huu wa Taka Sifuri ni muhimu sana kwa sababu ni mfumo unaotoa fursa ya ajira kwa jamii, na pia ni mfumo unaohakikisha mtaa unakuwa na safi na salama kwa watoto na jamii kwa ujumla. Huu ni mfumo unaomilikiwa na jamii kwa asilimia mia moja wakiwemo watoto ambao ni taifa la leo.

Aidha naye Mwenyekiti wa Mtaa wa Bonyokwa Bw. Shabani Maliyatabu katika tukio hilo alisema kuwa jambo la muhimu ni kuwasisitiza wazazi na walezi kwamba nyumbani pawe chou cha mambo na matendo mema, ugomvi na vurugu nyumbani upelekea kuharibu mienendo na tabia za watoto wengi.

“Mzazi au mlezi ukiwa rafiki kwa mtoto na mtoto atakuwa rafiki kwa familia na kuwa na matendo na maadili mazuri,” alisema Bw. Maliyatabu.

Bw. Maliyatabu aliishukuru taasisi ya Nipe Fagio kwa kushiriki maadhimisho hayo lakini pia kwa kuunga mkono jitihada za maendeleo za kata yake ya Bonyokwa hususani katika sekta ya mazingira kwa kuhakikisha Bonyokwa inakuwa safi na salama kwa Watoto na jamii nzima.

Mratibu Sera kutoka taasisi isiyo ya kiserikali Nipe Fagio, Bi Veronica Hollela (Kulia) akizungumza kuitambulisha taasisi wakati sherehe za kuadhimisha Siku ya Mtoto wa Afrika zilizofanyika katika Shule ya Msingi Bonyokwa katika manispaa ya Ilala.  Katikati ni Mratibu Mawasiliano wa taasisi hiyo Muddy Kimwery na Afisa Uhamasishaji Jamii Abdallah Mikulu (Kushoto).

Mwenyekiti wa Mtaa wa Bonyokwa uliopo katika Manispaa ya Ilala, Bw. Shabani Maliyatabu akizungumza kuwakaribisha wageni waalikwa wakati wa sherehe za kuadhimisha Siku ya Mtoto wa Afrika zilizofanyika katika Shule ya Msingi Bonyokwa katika manispaa ya Ilala.